Uppgerð av løgtingsvalinum: Dagførd útgáva 2005, grundað á løgtingsvalið 2004

Tá løgtingsvalið er av og atkvøðurnar eru taldur upp, verður valið gjørt upp sambært løgtingsvallógini. Sambært hesi lóg eru 27 valdømisvaldir limir í løgtinginum og kunnu tað verða upp til 5 eykavaldir, soleiðis at talið av limum í løgtinginum í minsta lagi verður 27 og í mesta lagi 32 limir.

Skipanin við valdømisvaldum umboðum skal tryggja, at øll valdømini eru tryggjað eina ávísa umboðan á Føroya Løgtingi. Meðan skipanin við eykavaldum skal viga upp fyri ella tryggja eina rættvísari politiska umboðan (sí eisini niðanfyri viðv. eykavaldum umboðum).