Sedimentering og niðurbróting av lívrunnum evnum

Sedimenteringin av lívrunnum partiklum í Skálafirði, Kaldbaksfirði og Sundalagnum norðan fyri Streymin varð mátað í tíðarskeiðunum apríl-september 1987 og 1988. Mett verður, at umleið 30-50% av tí tilfarinum, ið sakk niður í botnvatnið, kom frá resuspensión omanfyri 40-45 metra dýpi. Botnvatnið fær sostatt partiklar frá einum øki, ið er munandi størri enn tað økið, ið botnvatnið fevnir um. Bert umleið helvtin av teimum lívrunnu partiklunum, sum sukku niður í botnvatnið um summarið, blivu niðurbrotnir, áðrenn botnvatnið varð skift út. Mátingar av redox potentialunum í sedimentunum benda á, at sulfatreduktión helst ikki er farin fram í Skálafirði og Kaldbaksfirði. Í Sundalagnum var potentialið tó nakað lægri og tað bendir á, at nakað av sulfatreduktión møguliga er farin fram seint um summarið.