,,Kalda holið”, ,,Golfstreymurin” og okkara veðurlag

Á heysti 2015 gjørdu fjølmiðlar kring allan heim nógv burtur úr einum havøki í landsynning úr Grønlandi, sum var óvanliga kalt og fekk eyknevnið: ,,Kalda holið” Hetta varð sett í samband við tann streymin, sum vit vanliga kalla ,,Golfstreymurin”, og onkur norðurlendsk sjónvarpsstøð bar tey tíðindi, at hann var viknaður við stórum árini á okkara veðurlag. Sambandið millum ,,Kalda holið” og ,,Golfstreymin” er tó ikki so einfalt, og alt bendir á, at hesin streymur hevur verið støðugur ta seinastu hálvu øldina. Hesi seinastu tjúgu árini hevur hann flutt meiri varma inn í okkara øki; heldur enn umvent. Enn er tó óvist, um hann fer at halda fram við somu styrki, so hvørt sum veðurlagið broytist.