Inklusjón í føroyska fólkaskúlanum: ein sjálvfylgja ella ein avbjóðing?

Í almenna rúminum verður ofta ført fram, at vit í Føroyum hava ein fólkaskúla fyri øll, tann sokallaða rúmliga skúlan, sum skal rúma øllum børnum og at vit harvið eisini hava ein inkluderandi skúla. Men hvussu er støðan í veruleikanum? Er tað ein inkluderandi skúli, vit hava – ella er tað ein rúmligur skúli, sum tey seinastu ára tíggjuni er vorðin alsamt minni rúmligur?
Henda greinin setir sjóneykuna á, hvat inklusjón merkir, hví inklusjón hevur týdning og hvussu mann kann menna ein inkluderandi skúla - og hvat tað krevur um vit skulu flyta okkum frá hugtakinum “ein rúmligan skúla” til “ein inkluderandi skúla”, sum bæði má vera orð í kjaki og á pappíri, men sum eisini má vera umsett og íverksett í gerandisdegnum í skúlunum.