Havnar søga í høvuðsheitum

Tórshavnar býaratlas er heildarskráseting av varðveitingarverdum húsum og býarumhvørvum í Havn, og er eitt amboð at skapa yvirlit og geva okkum eina fatan av teimum býarvirðum, sum ein býarmenning ikki altíð gevur sær far um og tekur støðu til. Tí er ætlanin, at býaratlasið skal gerast ein av fyritreytunum í framtíðarútbyggingarætlanum hjá kommununi. Skrásetingin er gjørd sambært SAVE (Survey of Architectural Values in the Environment) mátanum – ein arbeiðsháttur, sum danska umhvørvismálaráðið hevur ment, og sum í hesi bók er lagað til føroysk viðurskifti og føroyskan byggisið.