Fiskasníkar

Fjøld av ymiskum verum liva í og á fiski. Hvørt fiskaslag hevur sníkar frá heilt ymiskum verubólkum. Í greinini verða viðgjørd dømi: virus, bakteriur, einkyknuverur, soppar, rundormar, rívormar, bendilormar, iglar, iktur og krabbadýr. Ávirkanin á tann einstaka fiskin er sera ymisk – líka frá ongari ávirkan til deyðiligt árin. Sníkarnir í einum fiski kunnu eisini siga nakað um føðina hjá fiskinum. Haraftrat kann títtleikin av ávísum fiskasníkum nýtast til sundurgreining av fiskastovnum. Kunnleiki til fiskasníkar er alneyðugur, tá ið farast skal undir aling av ávísum fiskaslagi, í sambandi við veiðu og viðgerð av fiski og viðvíkjandi framleiðslu, keyp og sølu av fiskavørum sum heild. Árin á menniskju er bert ávíst frá bendilormi (Diphyllobothirum sp.) og rundormum (Anisakis simplex og Pseudoterranova decipiens).