Arbeiðsmegin á føroysku flaka- og fiskavirkjunum í framtíðini

Ein kanning, sum Granskingardepilin fyri Økismenning í 2003 gjørdi millum ung – øll sum gingu í 9. flokki og í 3. flokki á miðnámsskúlunum í 2003 – vísir, at ungir
føroyingar ikki ynskja at arbeiða á flaka- og fiskavirkjum. Hetta í sær sjálvum ber boð um broytingar fyri framman og tørv á tillagingum. Eisini setir hetta spurnartekin við, í hvønn mun man í Føroyum kemur at kunna nøkta tørvin á arbeiðsmegi innan hesa vinnu – og ikki minst, um man ynskir at føroysk arbeiðsmegi skal loysa hesar uppgávur?

Hendan verkætlanin setur fokus á evnið “arbeiðsfólk í føroysku flaka- og fiskivinnuni í framtíðini” og roynir m.a. at svara nøkrum spurningum í sambandi við, hvørji arbeiðsfólkini á flaka- og fiskavirkjunum eru í dag og hvørji, vit kunnu vænta fara at manna hesi arbeiðspláss í framtíðini.

Fyri føroysku flaka- og fiskivinnuna og fyri politiska myndugleikan vil hendan
frágreiðing geva svar uppá fleiri áhugaverdar spurningar. Í so máta kann kanningin eisini brúkast sum partur av kjakinum um ein framtíðar politikk á hesum økinum, bæði hjá vinnuni og hjá tí politiska myndugleikanum.