Ávirkan av húkastøddum og agni á støddarbýtið av toski og hýsu, veidd við línu

Ein roynd við ymiskum agni og ymiskum húkastøddum á línu vísti, at stórur fiskur (toskur og hýsa) bert í ávísan mun tók størri húk enn smáur fiskur. Hinvegin hevði agnslagið nógv at siga fyri støddina og eisini, hvussu feitur fiskurin var. At brúka stóran húk og fiskaagn (makrel ella sild) hevði minkað munandi um nøgdina av smáfiski á línuni við tað, at miðalstøddin á toskinum møguliga hevði verið økt við 6-10 cm. Tíverri hevði hetta eisini ført til munandi minni fiskiskap (veiðu per húk). Fyri hýsu vóru bert umleið 2 cm at vinna við at brúka fiskaagn, men fiskiskapurin hevði neyvan minkað.