Starvslærulæraraútbúgving ongantíð ov skjótt

Description

Ein aðaltáttur í læraraútbúgvingini má vera starvslæran, og umráðandi er í hvønn mun tað eydnast at knýta starvslæruna at lesnaðinum annars. Sum heild eru læraralesandi samd um, at starvslæran er ov stutt og ov lítið skipað. Herálvur Jacobsen, formaður Føroya Lærarafelags, skrivar

Subject

Í seinasta Skúlablaðnum nr.6/2014 er áhugaverd samrøða við Elsu Birgittu Petersen, sum í oktobur í fjør fór frá sum skúlastjóri í Hvalbiar skúla. Elsa Birgitta hevur javnan gjørt vart við seg í skúlakjaki sum lærari, skúlastjóri og ikki minst í lærarafelagshøpi. Í greinini fílist hon m.a. á, at Læraraskúlin ikki brynjar komandi lærarar nóg væl til dagsins skúla. Serliga hugstoytt er at lesa, at hon metir, at ungu lærararnir ikki longur vísa á nýggjar leiðir. Eitt álvarsamt uppáhald, sum tó ikki er tikið úr leysum lofti. Eitt nú vísir kanningin hjá Hans Harryson Hansen, Aftursvar frá 2012, at nýútbúnir lærarar meta seg ikki at vera nóg væl brynjaðar til lærarastarvi, serliga tá tað kemur til tann meira verkliga partin av starvinum, t.d. foreldrasamstarv, floksleiðslu, at gera ársætlanir o.a.